Landssamtök íslenskra stúdenta

Hvað er LÍS?

Landssamtök íslenskra stúdenta, eða LÍS, voru stofnuð 3. nóvember 2013 og eru samtök háskólanema á Íslandi sem og íslenskra háskólanema á erlendri grundu. LÍS eru regnhlífarsamtök og standa að þeim átta aðildarfélög sem eru í forsvari fyrir stúdenta við Háskólann á Akureyri, Háskólann á Bifröst, Landbúnaðarháskóla Íslands, Listaháskóla Íslands, Háskólann í Reykjavík, Háskólann á Hólum, Háskóla Íslands og fyrir íslenska stúdenta sem stunda nám erlendis. LÍS er því í forsvari fyrir rúmlega 20 þúsund íslenskra stúdenta.

Hlutverk samtakanna

Hlutverk samtakanna er að standa vörð um hagsmuni stúdenta háskólanema hérlendis sem og hagsmuni íslenskra stúdenta háskólanema á alþjóðavettvangi og um leið skapa samstarfsvettvang fyrir íslensk stúdentafélög. Samtökin skulu vera virkur þátttakandi í alþjóðlegu hagsmunasamstarfi stúdenta og vinna að samræmingu gæðastarfs í íslenskum háskólum. Þau hafa umboð til samningagerðar, framkomu gagnvart stjórnvöldum, fjölmiðlum og öðrum aðilum fyrir hönd íslenskra stúdenta.

Nánar um hlutverk samtakanna má nálgast í 2. gr. laga LÍS.

Uppbygging

Í framkvæmdastjórn samtakanna sitja tveir fulltrúar frá hverju aðildarfélagi en á landsþingi tilnefnir hvert aðildarfélag einn fulltrúa til setu í tvö ár. Innan samtakanna starfa 7 nefndir sem eru alþjóðanefnd, gæðanefnd, lagabreytingarnefnd, fjármálanefnd, markaðsnefnd, jafnréttisnefnd og viðburðanefnd. Öllum háskólanemum er frjálst að sækja um í nefndirnar en auglýst er í þær að hausti ár hvert.

Landsþing LÍS fer með æðsta ákvörðunarvald samtakanna en það er haldið á hverju ári. Þar hittast öll aðildarfélög LÍS og kjósa um helstu málefni samtakanna. Einnig er unnin bæði innri og ytri stefnumótunarvinna í samstarfi við framkvæmdastjórn og nefndir LÍS.

Verkefni

Samtökin halda utan um verkefni af ýmsum toga en helst mætti nefna skipulagningu ýmissa málþinga og viðburða tengdum málefnum stúdenta, þátttöku stúdenta í gæðaúttektum á námi í háskólum landsins, alþjóðastarf íslenskra stúdenta og skipun fulltrúa stúdenta í ýmsar nefndir. Í gegnum þessi verkefni gegnir LÍS einnig mikilvægu hlutverki þar sem samtökin vinna að því að stúdentar njóti jafnréttis og að raddir allra hópa innan háskólasamfélagsins heyrist.

LÍS er aðildarfélag að European Students’ Union  (ESU) sem eru regnhlífarsamtök fyrir landssamtök stúdenta í Evrópu. Þátttaka í starfi ESU krefst þess að fulltrúar séu sendir á ráðstefnur og þing sem haldin eru í Evrópu.

LÍS tekur þátt í samstarfi NOM sem eru samtök landssamtaka stúdenta norðurlandanna og eystrarsaltsríkjanna.